Skessuhorn:

Fjölmenni endurvakti Félag hundaeigenda

9. febrúar 2010

Yfir 100 hundaeigendur á Akranesi komu saman til fundar í gærkvöldi í þeim tilgangi að endurvekja Félag hundaeigenda í bænum en það hefur ekki verið starfandi sl. 15 ár. Fundurinn fór fram í Gamla Kaupfélaginu við Kirkjubraut. Kosin var stjórn og kallað eftir hugmyndum fundargesta um hvert hlutverk félagsins ætti að vera. Síðar á þessu ári er fyrirhugað að halda framhaldsstofnfund þar sem lögð verða fram drög að lögum félagsins. Snorri Guðmundsson var kosinn formaður Félags hundaeigenda á Akranesi en aðrir stjórnarmeðlimir eru Sigrún Baldursdóttir, Sigrún Ríkharðsdóttir, Jón Gunnar Mýrdal og Ingunn Dögg Eiríksdóttir. Varamenn voru kosnir Sævar Jónsson, Egill Ragnarsson og Gunnar S. Ragnarsson.

Fram kom á fundinum að félagið ætlar t.d. að beita sér fyrir góðum samskiptum milli hundaeigenda og bæjaryfirvalda. Ýmsar spurningar komu fram um hundaeftirlitsmann bæjarins, hver væri starfslýsing hans og hver fengi sektarfé ef leysa þarf út hund sem hundaeftirlitsmaður hefur fangað. Fundargestir vildu sjá hundasvæðið eins og það var þegar best lét, með leiktækjum fyrir hunda og að þar verði haldin hlýðninámskeið. Spurningar vöknuðu hvort hestar ættu einnig að vera á skilgreindu hundasvæði við Kalmansvík.  Nokkrir fundargestir hvöttu Akraneskaupstað til að draga til baka fyrri ákvörðun um kosningar um hundahald samhliða sveitarstjórnarkosningum í vor.